Las empremas diesch minutas

Dacuort ha giu liug a Lumbrein igl exercezi regiunal dallas uniuns samaritanas,

organisaus uonn dall’Uniun samaritana Lumnezia. Tier quella occurenza ha la

presidenta dall’Uniun samaritana Lumnezia, Petra Derungs, saviu beneventar

varga 80 samaritanas e samaritans dallas uniuns Breil/Danis, Castrisch,

Trun/Sumvitg, Vuorz/Andiast, Lumnezia sco era las giuvnas pumpieras da

Sursaissa.


Ei sa schabegiar da tut temps e dapertut. In accident sin via ni in accident sil

plaz da lavur, ina disgida dil cor. En in cass urgent quenta mintga secunda.

Tochen ch’il survetsch da salvament professiunal arriva dependa ei mintgamai

digl agir dallas persunas che dattan gl’emprem agid d’urgenza. Agir spert e senza targlinar decida savens sur veta e mort.Sis scenaris cun accidents e situaziuns d’agid d’urgenza, sin differents plazs spatitschai pil vitg entuorn haveva Alexander Casanova, meinacuors dall’Uniun samaritana Lumnezia, e ses gidonters preparau. Era il miedi Mario Venzin eistaus presents. Sco figurants ein commembers dall’Uniun da teater Cuschnaus

stai a disposiziun. En gruppas ei vegniu exercitau mesiras d’agid d’urgenza. Buca mo las persunas disgraziadas drovan agid. Savens ein pliras persunas cumpigliadas, ha ina persuna in schoc ni ei apatica eisi d’observar e dar agid perquei che siu sedepurtar sa haver fatalas consequenzas. Tenor il rapport dil meinacuors ei vegniu luvrau seriusamein e cun grond engaschi. Las gruppas ein rotadas da post tier post. Ils meinagruppas han mintgamai observau e giudicau l’acziun, currigiu ni dau tips.

Suenter igl exercezi da biebein duas uras ha l’Uniun samaritana Lumnezia envidau ad in puschegn, organisaus dad Angela Capaul. Ina sentupada da pliras uniuns dat la pusseivladad da brattar ora meinis ed experientschas e da tgirar contacts persunals. En scadin cass havein nus giu grond tschaffen da surprender uonn quell’incarica. Nus engraziein a tuttas participontas ed a tuts participonts e selegrein gia uss sin la proxima scuntrada communabla.

19 Ansichten0 Kommentare

Aktuelle Beiträge

Alle ansehen